Господи, Иисусе Христе, Боже наш! Ты сирых Хранитель, скорбящих Прибежище и плачущих Утешитель. Прибегаю к Тебе аз, сирый, стеня и плача, и молюся Тебе: услыши моление мое и не отврати лица Твоего от воздыханий сердца моего и от слез очей моих. Молюся Тебе, милосердный Господи, утоли скорбь мою о разлучении с родившим и воспитавшим (родившей и воспитавшей) мя родителем моим (материю моею) (имя) (или с родившими и воспитавшими мя родителями моими, имена их), душу же его (ея, или души их), яко отшедшую (отшедшие) к Тебе с истинною верою в Тя и твердою надеждою на Твое человеколюбие и милость, приими в Царство Твое Небесное. Преклоняюсь пред Твоею святою волею, еюже отъят (отъята, отъяти) бысть (быша) у мене, и прошу Тя, не отыми точию от него (от нея, от них) милости и благосердия Твоего. Вем, Господи, яко Ты, Судия мира сего, грехи и нечестия отцев наказуеши в детях, внуках и правнуках даже до третьяго и четвертаго рода: но и милуеши отцев за молитвы и добродетели чад их, внуков и правнуков. С сокрушением и умилением сердца молю Тя, милостивый Судие, не наказуй вечным наказанием усопшаго незабвеннаго (усопшую незабвенную) для мене раба Твоего (рабу Твою), родителя моего (матерь мою) (имя) (или усопших, незабвенных родителей моих, имена их), но отпусти ему (ей, им) вся согрешения его (ея, их) вольная и невольная, словом и делом, ведением и неведением сотворенная им (ею, ими) в житии его (ея, их) зде на земле, и по милосердию и человеколюбию Твоему, молитв ради Пречистыя Богородицы и всех святых, помилуй его (ю, их) и вечныя муки избави. Ты, милосердный Отче отцев и чад! Даруй мне, во вся дни жизни моея, до последняго издыхания моего, не преставати памятовати о усопшем родителе моем (усопшей матери моея, усопших родителях моих) в молитвах своих и умоляти Тя, праведнаго Судию, да вчиниши его (ю, их) в месте светле, в месте прохладне и в месте покойне, со всеми святыми, отнюдуже отбеже всяка болезнь, печаль и воздыхание. Милостиве Господи! Приими днесь о рабе Твоем (Твоей, рабех Твоих) (имя или имена их) теплую молитву мою сию и воздай ему (ей, им) воздаянием Твоим за труды и попечения воспитания моего в вере и христианском благочестии, яко научившему (научившей, научившим) мя первее всего ведети Тя, своего Господа, в благоговении молитися Тебе, на Тебе единаго уповати в бедах, скорбех и болезнех и хранити заповеди Твоя; за благопопечение его (ея, их) о моем духовном преуспеянии, за тепле приносимыя им (ею, ими) о мне моления пред Тобою и за все дары, им (ею, ими) испрошенные мне от Тебе, воздай ему (ей, им) Своею милостию, Своими небесными благами и радостями в вечном Царствии Твоем. Ты бо еси Бог милостей и щедрот и человеколюбия, Ты покой и радость верных рабов Твоих, и Тебе славу возсылаем со Отцем и Святым Духом, и ныне и присно и во веки веков. Аминь.